१२३ हात उलटा, सायकल पलटा

                  १२३  हात उलटा, सायकल पलटा 

     हायर सेकंडरीतले दिवस . पाचसहा मित्र चालत चाललो होतो . गावगप्पा गोष्टीगजाली . हसत खिदळत कॉलेज जवळ करीत होतो . सकाळ असल्याने महामार्गावर वाहने कमी . एखाददुसरे रोरावत निघून जाई. त्याला वाट करून दिली की पुन्हा रस्ता व्यापायला आम्ही मोकळे . 
     ' किण किण, किण किण ' मागून सायकलच्या घंटीचा आवाज . मागे वळलो तर सुरेश ! सुऱ्या ! आज सायकलवरून आला होता . शायनिंगचा मूड तर त्याचा अतिउत्साही चेहरा ओरडून ओरडून सांगत होता . 
     ' मी हात उलटे धरून सायकल चालवितो . तुम्हाला कुणाला येते का ?  बेट ( पैज ) मारायची का ? ' कोसळणाऱ्या धबधब्यावर पाणी ओतून काय फायदा ! 
     ' चला मीच चालून दाखवितो . हे बघा . '
     सुऱ्याने हेन्डलवर डाव्या जागी उजवा व उजव्या जागी डावा हात पकडला . हातांची कातर केली . पायडल मारले आणि सायकल चालू  झाली . 
     ' जितं मया ' च्या आवेशात दोनचार मीटर गेला असेल नसेल ! अकस्मात समोरून एन. पी. ट्रकाने एन्ट्री घेतली . वाहन समोर आल्यावर आपण काय करतो ? सायकल डावीकडे वळविण्यासाठी डावा हात मागे करतो व त्याच बरोबर उजवा हात पुढे करतो . सुऱ्याने बरोब्बर तसेच केले . पण हाय रे कर्मा ! हात उलटे असल्याने सायकल उजवीकडे वळली . सुऱ्याच्या गोट्या मस्तकात ! 
     हात उलटे असल्याचे लक्षात येताच सुऱ्याने वेळ नाही घालवला . झटक्यात उलटा व्यवहार केला . डावा हात पुढे घेतला . उजवा हात मागे घेतला . सर्वशक्तीनिशी पायडल दाबला आणि आणि …डावीकडील मीटर दीड मीटर खोलीच्या शेतामध्ये धाडदिशी पतन . 
     चौकोनी करंदीकरांच्या त्रिकोणी व्याकरणाला गोल करीत वर्गात अनुप्रास जुळला . ' सादोळशेच्या सुऱ्याने सोनी सायकलवरून सोमवारी  सकाळी  सुंदर सूर्याला सिर साष्टांग सूर्यनमस्कार घातला . ' अन वर्गात हास्याचा धबधबा फुटला . `

१२२ काणी खाणी कोतवा . . . .

१२२ काणी खाणी कोतवा . . . . 

     

     संध्याकाळची वेळ . पाय मोकळे करण्यासाठी बाहेर पडलो .साहजिकच देवळाच्या दिशेने पावले वळाली . वाटेत मित्र दिसला आणि थबकलो .शिळोप्याच्या गप्पा रंगल्या .

     मित्राचा निरोप घेणार इतक्यात कच्चदिशी रोधक लागले . गाडी उभी झाली .गावातील एक माणूस गाडीतून उतरत होता .विदेशी बनावटीची किमती गाडी . काळ्या रंगाच्या काचा. दिमाखदार आकार . हा माणूस खाण  व्यवसायात उतरल्याचे कानावर आले होते .खोऱ्यानी पैसा ओढतोय असेही ऐकले होते . पण इतके ?

     क्षणभर गतकाळात गेलो . रस्त्याच्या कडेला बसून आल्या गेल्याची टिंगल टवाळी करणारा हा .एखादी देणारा आणि चार खाणारा .शिक्षणाचा गंधही नाही .खिशात दमडी नाही . आणि आज कोठल्या कोठे !

     " वळण घ्यायला आलो होतो . तुम्ही दिसलात आणि थांबलो . " तो उदगारला . दोन शब्द बोलून तो जायला निघाला . दूर संवेदीने त्याने दार उघडले . गाडीत बसला .आणि गरकन त्याने वळण घेतले . गाडी विदेशी होती पण रस्ता स्वदेशी होता .खाड्कन कडेच्या दगडाला त्याने गाडी ठोकरली . 

     माझ्या मनात विचार आला .आता तो खाली उतरणार .सरकारला, बांधकाम खात्याला शिव्या घालणार . पण कुठचे काय ? काहीही झाले नसल्याच्या अविर्भावात तो सुळकन निघून गेला होता . शर्टाच्या बाहीवर पडलेला मातीचा कण टिचकीने उडवावा तसा तो गाडीचा धक्का त्याने उडविला .

     .मित्र  म्हणत होता  " या गाडीची किमत आहे ४८ लाख  "

१२१ आणि सहकार भांडाराची दृष्ट निघाली

             १२१ आणि सहकार भांडाराची दृष्ट निघाली
     
    सकाळचा प्रसंग . सामान घेण्यासाठी सहकार भांडारात गेलो होतो . मला पाहिजे ते सामान घेऊन पैसे देण्यासाठी रांगेत उभा राहिलो. माझ्या पुढे एक बाई होती.  तिच्या सामानाची किंमत करण्याचे काम सुरु होते . 
     किंमत करता करता रोखीने मिठाची पिशवी उचलली. ती किंमत बघतेय तोवर त्या पिशवीतून मिठाची धार सुरु झाली . रोखीचे आसन, गणनयंत्र, पैसॆ आणि स्वतः ती रोखी मिठाने शुचिर्भूत झाली. 
     रोखीचे ताडताड वाक्ताडन सुरु झाले . आगीत लाह्या तडतडाव्यात तशी तिची मुक्ताफळे उसळू लागली . ' दिसत नाही का ? फुटकी पिशवी कशाला आणली ? कुठून कुठून लोक येतात . ' 
     ती बाई बापडी गप्प बसली . पैसे देऊन चालू लागली . गलेलठ्ठ पगार खाऊन फुगलेली रोखी .  तिला काळवेळ समजलाच नाही . गिऱ्हाईक देवता असते हे उमगलेच नाही . म्हणूनच असेल कदाचित, देवाने सहकार भांडाराची दृष्ट काढली .